Halldóra Kristín Pétursdóttir hefur tekið til starfa sem verkefnastjóri íslensku og inngildingar hjá Mýrdalshreppi. Alls sóttu átta manns um starfið.
Halldóra Kristín hefur lagt stund á nám í félagsráðgjöf og þjóðfræði við HÍ auk þess að taka áfanga í guðfræði. Hún starfaði í yfir 20 ár við rekstur verslunar / heildverslunar og sá þá m.a. um starfsmannamál og auglýsinga- og kynningarmál. Hún hefur verið virkur þátttakandi í starfsemi Rauða krossins (RKÍ) allt frá árinu 2004 og hefur starfað þar sem sjálfboðaliði og launþegi. Meðal þeirra verkefna sem hún hefur sinnt hjá RKÍ eru ungmennastarf RKÍ, svörun í Hjálparsímann 1717, undirbúningur móttöku flóttamanna auk þess sem hún hefur komið að skyndihjálparnámskeiðum RKÍ á landsvísu. Þá hefur Halldóra annast þjálfun sjálfboðaliða RKÍ, setið í stjórn Hafnarfjarðar og Gaðabæjardeildar í yfir 10 ár, hún sat í afmælisnefnd 2010 og var varamaður í neyðarvarnarnefnd höfuðborgarsvæðisins. Undanfarin ár hefur hún sinnt neyðarvörnum fyrir félagið og m.a. verið í útkallshópi í áfallahjálp og sálrænum stuðningi. Halldóra hefur í gegnum starf sitt hjá RKÍ sótt fjölda námskeiða á vegum félagsins, s.s. námskeið í áfallahjálp og sálrænum stuðningi frá 2006. Hún er með leiðbeinenda réttindi frá RKÍ til þess að kenna sálrænan stuðning.
Halldóra er einnig sjálfstætt starfandi listamaður og hefur haldið námskeið í vatnslitamálun á höfuðborgarsvæðinu og á landsbyggðinni allt frá árinu 1998.
Halldóra mun í starfi sínu sem verkefnastjóri hafa daglega umsjón og verkefnastýringu vegna innleiðingar á inngildingarstefnu sveitarfélagsins og vinnur náið með Enskumælandi ráði. Verkefnastjóri mun jafnframt skipuleggja fræðslu, ráðgjöf og annast kynningu á íslensku og inngildingu.
Halldóra er boðin velkomin til starfa hjá Mýrdalshreppi.